Þrettándi

dagur jóla. Hún er nú pínu skondin núna, hún Kaffikerla. Hún veit ekki alveg hvernig hún á að takast á við 2012. Árið 2011 var óttalega krossgötótt og hún er bara ekki tilbúin til að takast á við 2012 sem stendur við enn fleiri krossgötur. Kaffikerla telur sér trú um að hún þurfi fleiri daga til að liggja utan almanaks og lesa skáldsögur. Það fer ekki vel í hana að hafa ekki allt of mörg verkefni. Já, þetta er tvöföld neitun, hún þarf að hafa of mikið að gera.



Hún stendur því í eldhúsinu og bakar smákökur eins og jólin séu alveg að koma en ekki fara. Þær ilma dásamlega og strákarnir spila Bráðum koma blessuð jólin á blokkflautu og horfa á Jóladagatalið í sjónvarpinu alveg í stíl.

Hún hlustar þó ekki á jólalög. Það þarf ekkert að kalla á karlana með hvítu fötin. Og henni þótti voða gott að hitta nemendur sína í dag. Hún þarf bara nokkrar smákökur og skáldsagnalestur til að fá fæturna til að ganga í takt. Hlýja ullarsokka. Hún syngur af krafti þó hún viti að nágrannarnir heyri. Samtal í sumar við nágranna:
"já, svo þú kennir bara á flautu?
Já.
Ertu þá að læra að syngja?
Nei, mér finnst bara gaman að syngja
já,,, þú syngur vel
takk, hvað segirðu sástu hvert strákarnir fóru?"

Það er myrkur svo hún sér ekki sjóinn og henni dettur ekki í hug að taka upp gítarinn. Hún mótar degið með jólarauðum nöglum og tekur árið 2012 í fangið. Syngjandi sumarlög...