Kammertónlist

Ótrúlega flottur listamaður og ég klikkaði niður á þetta í rigningunni og rokinu. Hún stendur fyrir sumartónlist í mínum huga en síðasti diskurninn hennar var þyngri og dekkri og skaut skökku við. En ég keypti hann og hlustaði á fyrir tónleika sem hún hélt í maí 2009 hér á Nasa í Reykjavík. Þá var hún að hefja tónleikaferð með nýjustu plötuna sína en sú tónleikaferð var aldrei farin því Lhasa de Sela dó 1. janúar árið 2010 eftir baráttu við krabbamein. Og allt í einu var það svo skýrt afhverju diskurinn var svona þungur. Hvers vegna hún grét á tónleikunum á Nasa. Á þessum myndböndum sem voru tekin upp í Montreal í apríl 2009 sést hvernig hljómsveitin býr sig undir tónleikaferðalagið með nokkra þakkláta áheyrendur í kring um sig. Myndatakan er mjög flott þó að ekki sé hún beinlínis flókin en ég fæ það á tilfinninguna að dauðinn vofi yfir. Eða kannski er ég bara svona svakalega dramatísk. En öll myndatakan í gegn um hörpuna og svo er eins og við séum nú þegar farin að sakna Lhösu. Sjónarhornið er gjarnan aftan á hana. Við erum þegar farin að sjá á bak henni.




Þetta er greinilega kammertónlist í orðsins fyllstu merkingu því hún spjallar vinalega við áheyrendur og hlær dátt. Hugsanlega er þetta eins konar kveðja- requiem.



Ég er svo þakklát fyrir tónlistina hennar og ég hvet ykkur til að horfa á myndböndin. Þau gerði greinilega einhver sem deilir með mér þakklæti fyrir Lhasa de Sela.